Хүүхэд сар бүр ханиад хүрээд байна

 (III хэсэг) Цэцэрлэг болон сургууль дахь стресс. 

Халдвар авамтгай байдал нь сэтгэл санааны болон бие махбодийн ачааллаас үүдэлтэй байх нь цөөнгүй. Хүний эцэг эх хүүхдээ ирээдүйд гайхалтай бие хүн болж төлөвшөөсэй хэмээн хүсдэг. Гэхдээ хүүхдийг хөгжмийн ч, зургийн ч сургалтад зэрэг зэрэг явуулах нь утгагүй. Бүжгийн хичээлд яваад, уран гулгалтаар хичээллээд л, усанд сэлээд бүгдийг нэг дор хийлгэх гэвэл хүүхэд тэсэхгүй. Сайнаар бодоход ханиад томуу салахгүй саараар бодоход ачааллаа даахгүй мэдрэлийн ядаргаанд орно. ​

Хүүхэд цэцэрлэгт яваад эхлэхээрээ ханиад хүрээд эхлэх нь цөөнгүй. Эцэг эх ийм үед цэцэрлэгийн хүйтэн эсвэл халуун байгааг гайхаж, болж өгвөл бурууг бусдад наахыг бодно. Үнэндээ байж болох л асуудал. Хэрэв хүүхэд ойр ойрхон өвчилөөд байвал асуудлын гол нь өөрт нь чухамдаа хүүхэд олонтой байж сураагүйд бас бий. Энэ нь гэрээсээ холдож үзээгүйд мөн хүүхэд бүрэг ичимхийтэй бас холбоотой байж болно. Ингэхээр гэр орноосоо өөр газарт урт цагаар байхад хүүхдэд стресс үүсэх ба стресс нь хүүхдийн эсэргүүцлийг дарангуйлдаг аж. Хүүхдийн байгууллагуудын нөхцөл байдал нь боломжийн ч “хэт энхрийлсэн” хүүхдэд зориулагдаагүй. Тэгээд ч 3 нас хүрсэн хүүхэд болгон олон дунд орох хэмжээгээр дархлааны бойжилт гүйцсэн үү гэвэл бас л харилцан адилгүй. 
Хүүхэд төрсөн цагаас эхлэн дархлааны систем нь идэвхтэй хөгжиж эхэлдэг. Хэвлийд байхдаа эхээсээ авсан халдвар эсэргүүцэх эсрэг биетүүдийн ачаар эхний саруудад олон тооны халдвараас хамгаалагддаг. Төрсний дараа хөхний сүүгээр дамжуулан бэлэн хамгаалалт авна. Хүүхдийн өөрийнх нь дархлаа дундажаар 3 нас хүрэхэд нь хамгаалах төвшинд хүрдэг. Дунджаар гэхдээ хүүхэд бүр адилгүй, зарим нь эрт зарим нь орой. Тиймээс хүүхдийн хамгаалалтын төвшинг зөв үнэлэлгүй 3 нас хүрэхээс нь өмнө олны дунд оруулах нь эрсдэлтэй . Хүүхэд 3-аас дээш настай ч цэцэрлэгт орсноор байн байн өвдөөд байвал ахиад 1 жил гэртээ байлгах нь зүйтэй.
Үргэлжлэл бий. 
Мэдээллийг бэлдсэн: Хүрмэн эмийн сан